Mən Vətənim Azərbaycanı  Dünyanın hər yerində- Avropa, MDB və Şərq ölkələrində  fəxrlə təmsil edən bir müğənni kimi deyə bilərəm ki, Hafiz Mirzə, onun parlaq obrazı həmişə mənim yanımda, mənim nəzərimdə olub, Mənə mənəvi dəstək verib, dayaq olub. Adətən sənət adamları arasında  müəyyən  paxıllıq, xüdpəsəndlik, gözgötürməzlik halları daha çox olur. Hafiz Mirzə mənim tanıdığım  çox az adamlardandır ki, o hamının uğuruna sevinə, başqalarının da inkişaf etməsinə,  tanınmasına çalışa bilir. Onun unudulmuş, yaşı ötmüş, qocaman  sənətkarların yubiley və xatirə gecələrini keçirtməsi, barələrində maraqlı, gözəl məqalələr yazması, hamını həvəsləndirə, yaradıcılığa sövq edə   bilməsi çox tərifəlayiq bir haldır. Həm gözəl yazıçı, həm gözəl publisist, həm də gözəl mədəniyyət və incəsənət xadimi olmaq və eyni zamanda həm də çox səmimi insan olmaq heç asan məsələ deyil və bütün bunlar Hafiz Mirzəni başqalarından fərqləndirən cəhətlərdəndir. Bütün bunlarla  yanaşı o həm də Azərbaycan Dövlətçiliyinin həqiqi aşiqi, ona qarşı olan qüvvələrin qatı düşməni, əsl mərd-mübarizdir. Mən onun 1993-cü ildə etnik separatizmə qarşı  mübarizənin önündə olduğu günləri xatırlayıram.  Öz Dövlətini, Vətənini  bu qədər  çox sevən yaradıcı insanlarla daim ünsiyyətdə olmaq çox xoşdur.

CAVAD RƏCƏBOV
populyar müğənni